სისხლის სამართლის პროცესის ევროპეიზაცია და დაზარალებულის სამართლებრივი მდგომარეობა
ანოტაცია
2010 წლის 1 ოქტომბერს ამოქმედდა ახალი სისხლის სამართლის საპროცესო კოდექსი, რომელმაც მთლიანად შეცვალა სისხლის სამართლის პროცესის წარმოების მოდელი და ინკვიზიციური პროცესის ნაცვლად, მხარეთა შეჯიბრებითობაზე დაფუძნებული სამართალწარმოების სისტემა დამკვიდრდა. რეფორმა შეეხო დაზარალებულის ინსტიტუტსაც, რომლის როლიც არსებითად შეიცვალა და მისი უფლებები, ძირითადად, მოწმის უფლებებს გაუთანაბრდა. შედეგად მივიღეთ, რომ ნაკლოვანი საკანონმდებლო მოწესრიგების ფარგლებში, დაზარალებულებს არ აქვთ შესაძლებლობა, სათანადოდ იყვნენ ჩართული სამართალწარმოების პროცესში. დაზარალებულის ასეთი პასიური როლი უარყოფითად არის შეფასებული საერთაშორისო თუ ეროვნულ ლიტერატურასა თუ წყაროებში. ამდენად, დღის წესრიგში დგას საკითხი, რა როლი უნდა ჰქონდეს დაზარალებულს სისხლის სამართლის პროცესში. რამდენად სრულფასოვანი და საკმარისია კანონმდებლის პოზიცია დაზარალებულებთან დაკავშირებით? არის თუ არა საჭირო დაზარალებულებისათვის დამატებითი ბერკეტების მინიჭება და ხომ არ შეუქმნის ეს საფრთხეს სამართლიანი სასამართლოს პრინციპს?
